Rock

William
Doyle:

Your Wilderness Revisited

The Orchard

Hugsar du utsikta frå rommet ditt i tenåra? Eg tippar dei fleste vil svare ja til spørsmålet, og eit bilete vil teikne seg ganske raskt, av bygningar, landskap, stemningar som søv i ein og berre ventar på å la seg vekkje, alt ramma inn av vindauget ein såg ut av, i møte med ei verd som var ny kvar dag.

Grunntonen

Eit slikt bilete dannar grunntonen på William Doyles nye album Your Wilderness Revisited. I ein kort omtale av plata skriv artisten sjølv at prosjektet har teke form i han over ein periode på ti år: «Då eg forlét forstaden eg budde i gjennom tenåra, tok eg til å tenkje på og leggje merke til påverknaden han hadde hatt på meg, på arbeidet mitt og på mi eiga utvikling som menneske.

Arkitekturen og byplanlegginga i den moderne britiske forstaden har forma denne plata like så mykje som opplevingane og kjenslene eg tilskreiv dette landskapet i formative år.»

Somme lesarar vil kjenne Doyle frå bandprosjektet East India Youth. Your Wilderness Revisited er det første albumet han gir ut under eige namn. Før vi har høyrt éin tone, veit vi altså eit og anna om prosjektet: Det har mykje å seie for Doyle, og er forankra i hans eiga livsforteljing, det er ambisiøst, og det er tydeleg konseptuelt orientert.

Mange lag

Eg har lytta mykje til Your Wilderness Revisited dei siste vekene, og for meg høyrer albumet til mellom årets sterkaste. Opningssporet «Millersdale», som er namnet på forstaden i Hampshire der Doyle voks opp, leier oss til utsikta frå tenåringsrommet, til fasadar dekte med eføy, og noko som opnar seg og blømer, men også ei sorg som tek form – Doyle mista far sin på vegen frå barndom til ungdomstid.

«Everything fell upon me cascading indefinitely», syng Doyle over skimrande pianoakkordar, før viltre blåsarar får fortelje om ei sterk, indre uro, for så å verte etterfølgde av eit nærast euforisk synthmotiv. Den første komposisjonen på Your Wilderness Revisited fortel mykje om artistens estetiske orientering – det dreier seg om ein kompleks, mangetydig popmusikk med mange lag.

Fleire ekko

Det finst fleire openberre ekko på albumet – særleg går tankane tidt og ofte til Radioheads plater og til Thom Yorkes røyst, hans orientering mot det elektroniske, i det heile hans måte å tenkje musikk på. Det er heller ikkje vanskeleg å plassere Brian Eno inn i dette estetiske slektstreet, og han dukkar også opp – i eit spor der han resiterer frå ein sitatcollage henta frå ein designguide skriven i offentleg regi for byutvikling i Storbritannia.

Your Wilderness Revisited er eit medrivande, tankevekkjande og detaljrikt album som gjer krav på – og toler – stadig fleire lyttingar. Det fortel noko om Doyles tidlege vaksenliv, men viktigare er det at plata maktar å seie noko om korleis staden der vi lever, formar måten vi lever på.

Øyvind Vågnes

Øyvind Vågnes er forfattar og fast musikkskribent i Dag og Tid.