CD

Wolfgang Amadeus Mozart:

Messe c-Moll KV 427

Chor des Bayerischen Rundfunks; Akademie für Alte Musik Berlin;
dir.: Howard Arman.
BR Klassik 2018

Mozarts Store messe i c-moll blir gjerne sett på som ein «tonande biografi», eit verk inspirert av ei konkret hending i livet til komponisten: Ifylgje kona Constanze lova han å framføra messa i Salzburg som takk for at hans fyrste barn overlevde fødselen. Om me kan stola på Constanzes ord – ho fortalde denne historia lenge etter at mannen var død – er omstridt, ikkje minst på grunn av at Mozart faktisk aldri sluttførte prosjektet. For til liks med den andre store messekomposisjonen hans, det meir kjente Rekviemet i d-moll, er c-moll-messa ufullenda: Nokre satsar er berre noterte som skisser, ander satsar manglar heilt. For å framføra verket i dag må det difor rekonstruerast.

Ein slik rekonstruksjon blei nyss gjennomført av musikkvitaren Clemens Kemme ved konservatoriet i Amsterdam, og det er hans nye versjon me får høyra på dette påkosta dobbeltalbumet med Chor des Bayerischen Rundfunks og tidlegmusikkorkesteret Akademie für Alte Musik Berlin. På den eine CD-en får me sjølve verket, medan den andre inneheld ein interessant «lyddokumentar» om korleis Kemme gjekk fram for å attskapa Mozarts monumentalverk. I dokumentaren deltek både kor, songsolistar og orkester med små lydsnuttar som syner Mozarts ufullstendige originalsatsar og korleis Kemme gjekk fram for å fullenda dei.

Lyddokumentaren finst diverre berre på tysk. Men sjølve innspelinga står på eigne bein: Tempoa er velvalde og artikulasjonen i koret elegant og naturleg. Og ein varmare og meir fargerik klang enn den til Akademie für Alte Musik Berlin, kan knapt tenkjast.

Sjur Haga Bringeland

Sjur Haga Bringeland er musikar og fast musikkmeldar i Dag og Tid.