Rock

Haim:

Women in Music Pt III

Universal

«Hey man, what kind of question is that?»

Slik lyder ei av verselinene i «Man From the Magazine», ein av songane på Women in Music Pt. III, det tredje albumet frå Haim som nett er ute. Låten byggjer på ei grim, og diverre sann, forteljing, om møtet Este Haim hadde med ein mannleg musikkjournalist, og er nok eit vitnesbyrd om bransjens seigliva sexisme, i ord og tone.

Det dreier seg om eit velretta knyttneveslag og ei naudsynt påminning om kor smaklaus åtferd somme der ute trur dei kan tillate seg. «Man From the Magazine» er dessutan ein elegant hyllest til Joni Mitchell, som songen heilt tydeleg er inspirert av, og svært passande låner frå, og har ei av dei mest slagkraftige sistestrofene eg kan hugse å ha høyrt frå nokon artist.

Nære forteljingar

Tre søstre utgjer Haim: Este (34 år), Danielle (31) og Alana (28) Haim. Første album, Days Are Gone, kom ut i 2013, og dermed fortel enkel matematikk at yngste blad Haim har brukt tjueåra på å venje seg til livet som artist og medlem i familieband.

Songane på Women in Music Pt. III er fulle av brytingstid og sirklar inn ein del dyrekjøpte erfaringar, ikkje berre på det profesjonelle, men også på det private planet. «Hallelujah», til dømes, er ein gripande låt som fortel om tapet Alana leid då ein nær ven døydde i ei bilulukke for nokre år sidan. Søstrene syng kvar si strofe og fortel om ei takksemd for venskapen seg imellom, som har gitt dei styrke i motgangstid.

Women in Music Pt. III skyr altså ikkje det vanskelege og er svært så direkte i tekstane, der det også vert fortalt om depresjon, terapi og sjukdom, mot eit bakteppe som vi gjennom diverse presseomtalar og intervju får vite er eksplisitt biografisk. Dette høyrest gjerne ut som tungt materiale, men det ville likevel vere gale å seie at det er tungt å lytte, for Haim lagar lett, melodiøs, smart og kontant poprock, med djupn og tyngd i botnen. Variasjonen i uttrykket er større enn nokon gong før. Impulsane er fleire og kjem frå mange ulike stader.

Sommarplate

Albumet skulle eigentleg verte lansert i mars, med ein liten, halvhemmeleg turné på førehand, men det gjekk jo i vasken. I staden har Haim prøvd å halde fansen varme med alskens påfunn på nettet, og den siste tida har dei av openberre grunnar kjent seg kalla til å engasjere seg politisk, med ulike former for aktivisme, i det som utvikla seg til å verte opprivande vårmånader i USA.

No vert altså dette forsinka albumet for mange ei veritabel sommarplate. Høyr berre opningssporet «Los Angeles», ein song så varm av amerikansk vestkystsol at gløden tek knekken på eit kaldt vinterminne, eller «Summer Girl», bandets herlege variant over Lou Reeds «Walk on the Wild Side» (Reed er kreditert som medkomponist). Women in Music Pt. III gløder av sosialt engasjement, nære forteljingar og musikk som fengjer.

Øyvind Vågnes

Øyvind Vågnes er forfattar og fast musikkskribent i Dag og Tid.