ISRAEL

GAUTE LOSNEGÅRD

HOLMEDAL

«Mossad har aldri kontakta meg», skriv forfattaren Geir Olav Jørgensen i Dag og Tid nr. 23/2017. Nei, det trongst vel ikkje når ein frivillig stiller til teneste for Israels propagandamaskin. Med sine artiklar presenterer Jørgensen ein overflatisk og einsidig inngang til konflikten i Midtausten. Han følgjer ei fast oppskrift når han relativiserer striden mellom palestinarar og israelarar – det er då så mange andre som er verre enn Israel, hevdar han, nett slik som israelsvenene har halde på i årevis. Som om det skulle gjere saka betre.

Jørgensen er sterkt kritisk til boikott av Israel. Som vanleg blant israelsvener blandar han på høveleg vis saman boikott av jødar generelt og av staten Israel, og argumenterer for at jødane er ei spesielt ømfintleg folkegruppe som ikkje toler å bli utsette for slikt. Det kunne vere interessant å høyre kva han meiner om den tidlegare boikotten av Sør-Afrika, som dessutan hadde eit nært forhold til Israel i apartheidtida. Også blant boarane i Sør-Afrika rådde det idear om at dei var Guds utvalde folk. Også dei fordreiv dei opphavlege innbyggjarane i landet.

Hadde det vore noko tak i Jørgensen, som har reist så vidt i verda, så hadde han tatt turen og besøkt nokon av dei ikring 100.000 som flykta då Israel okkuperte Golanhøgdene, for å høyre kva dei synest om livet hans som okkupant.