BISTAND

SVERRE THUNE

HAUGSBYGD

Noreg gjev utviklingshjelp til 90 land. Det norske bistandsbudsjettet er på om lag 34 milliardar årleg. Det er sikkert fleire land som gjev bistand til nett dei same landa som Noreg støtter. Det synest å vera lite rasjonelt at Noreg skal gje bistand til heile 90 land. Det må verta ein dyr administrasjon og store reisekostnader for å fylgja opp bistanden i så mange land.

Noreg burde heller gje bistand til eit eller nokre få land. FN kunne organisere dette på ein god måte. På den eine sida er det land som treng bistand. På den andre sida land som kan gje bistand. Dette kunne samordnast slik at det vert teke omsyn til evna til å yte bistand i høve til trongen i bistandslandet.

Slik det er no, med heile 90 land å gje bistand til, går det sikkert bort mykje midlar til anna enn bistand. Og det vert lite oversikteleg korleis bistandspengane vert bruka. Det ein sparar ved å rasjonalisere bistanden på denne måten, kunne brukast til å gje meir bistand.

Kan hende folk ville verta meir engasjerte, og sjå meir positivt på hjelpetiltaka, dersom Noreg hjelpte færre land, som me får «eineansvaret» for frå FN.

Mange meiner at bistanden er bortkasta pengar. Ved å konsentrere seg om eitt eller nokre få land, kunne ein fylgja betre med på korleis midlane kjem til nytte, og bruken av pengane ville truleg lettare verta akseptert.