STADNAMN

RONNY SPAANS

ronny@dagogtid.no

I dag brukar vi sjølvsagt ikkje desse namna. Men det er viktig å bli minna på det store stadnamneskiftet Noreg gjekk igjennom for hundre år sidan. Tek vi føre oss gamle landskart, får vi sjokk. Om nynorsk ikkje vann kampen om status som eit einaste riksmål i landet, vann nynorsken kampen om Kartverket. Gustav Indrebø og andre kjekke målmenn syrgde for at nynorsk så å seia vart einerådande som stadnamn i fjord og fjell. Vi kan nemne i fleng: Steinkjær vart døypt om til Steinkjer, Eger til Eiker, Huchenæs til Haukanes, Lerfoss vart Leirfoss, Gula vart Gaula, ja, Fusche heitte det ein gong, i dag heiter byen Fauske.

Dei danske amta vart fylke. Søndre og Nordre Bergenhus Amt vart høvesvis Hordaland og Sogn og Fjordane. Men det var fornorskingar som òg ikkje vart gjennomførte, som Vatsøy for Vardø. No står vi framfor nye stadnamnendringar. Spørsmålet er om det finst ein ny Gustav Indrebø til å rettleie byråkratane. Namn på dei nye regionane, som «Innlandet» og «Vestlandet», gjev ikkje same språklege floget.